2Th 1 | GAM | STEP | Ye dumo Tesalonaika pillgi pai una nono Nane God ne, Iwa Kerman Jisas Krais boll mor kambono ge, no Pol ne Sailas ne Timoti, pepa bolo ye aunmon.

2 Thessalonians 1

1 Ye dumo Tesalonaika pillgi pai una nono Nane God ne, Iwa Kerman Jisas Krais boll mor kambono ge, no Pol ne Sailas ne Timoti, pepa bolo ye aunmon. 2 God nono Nane, ne Iwa Kerman Jisas Krais ye wandill golo aumbellka, ye ellne tukne arngan yenda moye.

Dumo Tesalonaika una imb kake aglo gi dje moi

3 Agana ambana kambono, ege ege no ye pille God wopake we dje aunmon. Me wopake pai pille dje aunmon. Ge ye pillgine ge pa wo er kerman pundaka, ye yenekne porapora kane wopake ye awinj mambine ge wo er kerman pi. 4 Embe pille, pillgi pai una dumo porapora mor al no po ye kandjine dje pla wormon. Una wo ye to, ye ke ye awinj ba ye aglo gi dje molo, imb kake, pillgi dje molo pinj mal ge, no kandjambe to una aumonka pir.

God nono kot du dje paro mal piya

5 Ye imb kakinj al ge kanmon, God kot paro mal yenda. Ge pille ye gaklene ngembill gor al ge, God kapla we djindaka ye une dumoye kantau yendo al er pakna pine kune yenda. 6 Alla God singare du dje yendo pille, ye imb awinj una ge une ga imb awo yem woro aunda. 7 Alla Iwa Kerman Jisas kupill al kere yene tau agelo dongall kambono ne, wamo kund boll er yem wonda poke ge, une ye imb kakinj ge i woro, no ibne pai ge aike i woro aundaka, kiwa mopon. 8 Une wo pagle, una God pille kane nayenj una ne, nono Iwa Kerman Jisas kandjiyembe wopake pille nayenj una ge, une tonda. 9 Une er yem wo yene unakye wopake ta mal boll moyeke kandjiye kerman pandaka, una pillgi dji una kane aya dje molo wo piyeke, ye no kadja dje aupin mal pillgi dji pille, ye para wo piye. Ba une mop awi una ge, une to derpall ye i djell wordaka, une yembe dongall pandaka, au djindo al moya ge, ga ellke molo ege ege ngembill golo moye.

Pol dumo Tesalonaika una pille kamang ye aundo

11 Wal embe panda dje kane no ege ege ye pille kamang embe ye God aunmon. Une yau toi mal ge, ye pille wane moyeke une pora we dje kanda. Ye wal wopake yembon dje yene ge une yembe bolo aundaka, ye pillgi dje molo yene mal une ye aunda moye. 12 No ye pille kamang yenmon ge, nono God ne, Iwa Kerman Jisas Krais wandill golo aumbellka ye singare yenj al ge nono Iwa Kerman Jisas kandjiye pla pandaka, une ye kandjine dje pla worda moye.